तुळजाभवानी मातेच्या शारदीय नवरात्र महोत्सवाला प्रारंभ, धार्मिक कार्यक्रमांच्या आयोजनासह 'या' महापूजाही केल्या जाणार

धाराशिव - धाराशिव जिल्ह्यातील तुळजापूर येथील श्री तुळजाभवानी मंदिर हे साडेतीन शक्तीपीठांपैकी एक आहे. महाराष्ट्राची कुलस्वामिनी म्हणून तुळजाभवानी देवीला ओळखले जाते. याठिकाणी संपूर्ण जगभरातून भाविक दर्शनासाठी येत असतात. नवरात्रीत तुळजापूर येथे मोठा उत्सव असतो. त्यामुळे या काळात भाविकांची मोठी गर्दी याठिकाणी असते. आजपासून सर्वत्र नवरात्रोत्सवाला प्रारंभ झाला आहे. तुळजापूर येथेही तुळजाभवानी मातेच्या शारदीय नवरात्र महोत्सवाला प्रारंभ झाला आहे. याचबाबत लोकल18 च्या टीमने घेतलेला हा आढावा.

महाराष्ट्राची कुलस्वामिनी आई तुळजाभवानी मातेच्या शारदीय नवरात्र महोत्सवाला घटस्थापनेने सुरुवात झाली आहे. आज 3 ऑक्टोबर पासून ते 18 ऑक्टोबर दरम्यान हा शारदीय नवरात्र महोत्सव संपन्न होणार आहे.  तुळजाभवानी मातेची "ललिता पंचमी" रथ अलंकार महापूजा, मुरली अलंकार महापुजा, शेषशाही अलंकार महापुजा, भवानी तलवार अलंकार महापुजा, महिषासुर मर्दिनी अलंकार महापूजा यासह विविध धार्मिक कार्यक्रम आयोजित करण्यात येणार आहेत. तर धार्मिक कार्यक्रमांनी शारदीय नवरात्र महोत्सव संपन्न होणार असून 18 ऑक्टोबरला नवरात्र महोत्सवाची सांगता होणार आहे.